Fedro 4.6

Cum victi mures mustelarum exercitu

(Historia quorum et in tabernis pingitur)

Fugerent et artos circum trepidarent cavos,

Aegre recepti tamen evaserunt necem.

Duces eorum, qui capitibus cornua

Suis ligarant, ut conspicuum in proelio

Haberent signum quod sequerentur milites,

Haesere in portis suntque capti ab hostibus;

Quos immolatos victor avidis dentibus

Capacis alvi mersit tartareo specu.

Quemcumque populum tristis eventus premit,

Periclitatur magnitudo principum;

Minuta plebes facili praesidio latet.